Oute
Von Pedro Lenz*
Oh, ooh, oooh, Oute,
provinziell und unbeschoute,
oh, ooh, oooh Oute,
lueg emou die häreghoute
Lüt überau die häreghoute
Lüt in däm Oute,
sy chöme vo Basu,
sy chöme vom Gäu,
sy chöme vom Thau,
sy chöme vom Aargou,
ouououou grad vom Aargou
vom Aargou und vo überou
chöme d Lüt uf Oute
überau, überau die häreghoute
Lüt in Oute, Lüt in Oute.
Die Zentrumslage der Stadt Olten
im Herzen der Schweiz
ist und bleibt
einer der wesentlichen Pluspunkte
für Stadt und Region Olten.
Und de d Aare,
chasch druffe fahren
uf der Aare Bötlifahren
oder schwümme
oder touchen
oder fischen oder ou
numen eifach
drann verby loufe,
numme drann verby oder drüber
über die auti, schöni
Houzbrügg.
Oh, ooh, oooh, Oute,
provinziell und unbeschoute,
Oute, Oute du drü-Tanne-Stadt
Oute du böimigi Boumstadt,
drü grossi, grossi, grüeni Tanne
drü grossi, grüeni Outner Tanne
uf drü runde, grüene Högerli
uf deren Outner-Fahne.
Drü Tannen uf der Outner Fahne,
do mueses eim doch fasch
es bitzeli Angscht mache,
wenn nächär ds Iisstadion
Chlyhouz heisst,
Chlyhouz, Chlyhouz amnen Ort
mit drüne Tannen uf der Fahne
Oh, Oute, lueg zueder,
Oh, Oute, häbder Sorg!
Die Zentrumslage der Stadt Olten
im Herzen der Schweiz
ist und bleibt
einer der wesentlichen Pluspunkte
für Stadt und Region Olten.
Und äbe:
ds Chlyhouz-Stadion
und ds Naturmuseum
und ds Historische Museum
und ds Kunschtmuseum
und ds Wärtschriftenmuseum
und d Stadtbibliothek
und d Jugendbibliothek
und ds Stadttheater
und ds Theater Studio
und d Outner Cabaret-Täg
und d Outner Wäut-Füum-Wuche
und d Houzbrügg
und d Jurafuess
und der Ildefonsplatz
und d Outner Schriftstöuer
und d Outner Schouspieler
und ds Outner Bahnhofbuffet,
und d Outner Isebähnler
grad d Outner Isebähnler,
wöu die sy mängisch
vo Langetau,
so wie der Giorgio,
womer eis Mou begägnet isch,
imne Doppustöcker
irgendwo im Aargou usse,
gloub öppen
uf Höchi Würelos.
Hockeni auso ir Isebahn,
lisen irgend so ne Wäutwuche,
wo dört umeglägen isch,
dänken irgendöppis,
dänke nüt Böses,
nei, i dänke gar nüt,
wöu wennde dänksch,
de chasch d Wäutwuche
wahrschinlech nümm läse,
item, hocken auso i däm Zug
und dänke gar nüt,
ghöreni e Stimm:
«Nächster Halt Olten,
Billete ab Zürich,
prochain arrêt Olten,
next Stop Olten.»
Sägeni zuemer, die Stimm,
die Stimm, die kenneni doch,
chunntmer doch bekannt vor!
Dasch doch e Stimm us mim Läbe,
dasch doch e Stimm us mire Jugend!
Und tatsächlech,
der Vitali Giorgio,
der Rägewurm-Tschörtschu!,
dä wo auben i üser Chindheit
ufem Pouseplatz
für zwänzzg Rappe Gagen
e Rägewurm het gschlückt,
dä het mis Billie wöue gseh!
«Jetz lueg ou, lueg ou,
lueg ou do!», Sägeni no,
«das isch jo, isch jo
der Vitali Tschörtschu!»
Und waser ou afe miech, im Läbe.
Billie tüeger kontrolliere,
und ober mis ou dörf luege.
Ober de ungerdesse
SBB-Kondukteur syg worde?
Ömu nid Härzchirurg, seiter,
wöu süsch, wärer jo jetz nid do
und würdmi nachem Billie froge.
Woner ou afe deheime syg,
hanine gfrogt.
Z Oute seiter,
mit Nachdruck und mit Überzügig,
är wohni z Oute
Oute syg super, vo Outen us,
sygs äbe niene häre wyt,
wöu Oute, Oute
Oute syg vo überau här
ire Haubschtung z erreiche,
aber ober jetz glych no,
mis Bilie dörf luege.
Die Zentrumslage der Stadt Olten
im Herzen der Schweiz
ist und bleibt
einer der wesentlichen Pluspunkte
für Stadt und Region Olten.
Oh, ooh, oooh, Oute,
provinziell und unbeschoute,
oh, ooh, oooh Oute,
lueg emou die häreghoute
Lüt überau die häreghoute
Lüt in däm Oute,
es isch ungloublech.
Sy chöme vo Basu,
sy chöme vom Gäu,
sy chöme vom Thau,
sy chöme vo Langetau,
wie der Vitali Tschörtschu,
wo mis Billie wott gseh
und grad verzöut,
är syg jetz ou en Outner.
«Ouououou Giorgio,
bisch ou en Outner?
bisch ke Trimbacher,
bisch ke Wangener,
bisch ke Dulliker,
bisch ke Däniker,
bisch ke Oensiger,
nei, bisch en Outner,
bisch e Drütanne-Städter,
bisch e Haubschtunde-Städter.»
Vo Oute hesch
e Haubschtung uf Basu
und e Haubschtung uf Züri
und e Haubschtung uf Bärn
und e Haubschtung uf Bieu,
und e Haubschtung überau häre.
Outen isch e Haubschtundeschtadt,
es isch fasch glych
wode bisch uf der Wäut,
uf Oute hesch eigetlech immer
und vo fasch überau här
öppen e Haubschtung.
Die Zentrumslage der Stadt Olten
im Herzen der Schweiz
ist und bleibt
einer der wesentlichen Pluspunkte
für Stadt und Region Olten.
Und der Vitali Giorgio
wott mis Billie kontrolliere
öppen uf Höchi Länzburg
und derbi isch doch
dä Vitali Tschörtschu
synerzyt auben ou immer,
mit üs zäme schwarz gfahre
im Schnäuzug
vo Langetau uf Oute,
i Hammer go Musig lose
und es haubs Billie
Langetau Oute Retour
het öppe zwöi Bier usgmacht
i der Beiz, im Hammer.
Und jetz ischer säuber Outner
und jetz ischer säuber Kondi
und jetz isch aues angers
und ig fahre düren Aargou
mit emnen Outner Isebähnler,
wo eigetlech Langethaler wär
und mues a Oute dänke,
mues a di Houzbrügg dänke,
mues a die Autstadt dänke,
mues a dä Bahnhof dänke,
mues die ganzi Zyt
nume no au Oute dänke.
Und im Spyswage hinge
hocket glychzytig vilecht,
grad der Alex Capus
oder der Bagger Küde,
wo mou mitem Bagger
z Oute hingerem Bahngleis
ine Beiz ine het wöue
oder d Fabienne Hörni
mitem Saxophon
oder der Rhaban Straumann,
oder süsch en Outner,
wo gar kei Ahnig het,
das jetz grad disen Outner
do im Zwöitklassabteili
mis Billie
möchti kontrolliere.
Und i üsere Chindheit
isch dä Vitali Tschörtschu,
dä Neo-Outner,
dä Überzügigs-Outner
eine vo de beschte gsy
nid numen im Rägewürm schlücke,
nei, zum Bischpüu ou im Singen
und im Turne oder im Schutte.
Und drum frogine,
ober gäng no singi
ober gäng no aube
a d Hockeymätsche göng
und bi jedem Wätter uf der Stehplatzrampi
z Langetau im Schore stöng
und ober dört obe gäng no
sys Liedli zum beschte gäb:
Oooutner dir düetmer leid
Oooutner göht wieder hei!
Aaaaui Outner sy bleich
Ooouten isch bireweich.
Aber der Vitali
isch jetz säuber vo Outen
und wott nüt meh wüsse
vo der ewige Rivalität
zwüsche Langetau und Oute
und foht im Gägetöu,
Outen aa rüehme,
so dasme fasch chönnt meine,
är schaffi nid bir Bahn,
sondern bim Tourismus-Büro:
Die Zentrumslage der Stadt Olten
im Herzen der Schweiz
ist und bleibt
einer der wesentlichen Pluspunkte
für Stadt und Region Olten.
Fasch eso seiters,
der Vitali,
im Zwöitklasswage
und frogt nächär,
ober mis Billie dörf gseh.
Was er de a däm Oute,
abgseh vo dere Haubschtunde-Sach
speziell chöng rüehme,
wotti vom Vitali wüsse,
was de Oute heig,
wo angeri Orte nid heige?
«D Cabaret-Täg!»
seit der Vitali,
das syg öppis,
do göng öppis,
müesi unbedingt
mou chou luege.
Und ober ächt no mis Billie
dörfti gseh.
Aber ig, i heig mit Cabaret,
nid so vüu am Huet,
sägeni zum Vitali,
i fingi das nid eso luschtig,
wenn au zämen unbedingt
und glychzytig
öppis z Lache wöue ha
syg chly wie Fasnacht
oder wie sone Sit-Com,
wome sogar no Lacher iischpili,
So dass au zäme wüssi:
Achtung, Achtung
jetz isches zum Lache.
Und ussertdäm
heigi nie begriffe,
worum das i üsem Land
aui Cabarettischtinnen,
wenn sie uf ne Bühni gienge,
sones Deux-Piece anneheige
und es autmodisches Handtäschli
und en autmodischi Brüue
und en autmodischi Frisur
und nächär eso umetussi
und so umequitschi.
«Nei, nei, nei!»,
seit der Vitali,
i heig vo nüt en Ahnig.
D Outner Cabaret-Täg,
das syg e grossi Sach,
müesi unbedingt ou mou häre,
das syg nid Fasnacht,
ganz im Gägetöu
und ober no mis Billie
dörf kontrolliere.
Und ig hanen aagluegt,
der Vitali Giorgio,
womer ir Chindheit aube
chly bewunderet hei,
wöu sy Vatter en Alfa het gha
und wöu er jede Summer
mit däm füürroten Alfa
uf Italie
i d Ferien isch gfahre.
Und i hamer überleit,
dasme denn i üser Chindheit
nid hätt chönne vermuete,
dass dä Giorgio einisch
en Outner wird,
e richtig überzügten Outner
wo mis Billie wott luege
und syni Stadt rüehmt
und jedes Johr
a d Outner Cabaret-Täg geit
und nid wott,
dasmen eis kritisches Wort,
über sys Oute seit.
Die Zentrumslage der Stadt Olten
im Herzen der Schweiz
ist und bleibt
einer der wesentlichen Pluspunkte
für Stadt und Region Olten.
Oh, ooh, oooh, Oute,
provinziell und unbeschoute,
oh, ooh, oooh Oute,
lueg emou die häreghoute
Lüt überau die häreghoute
Lüt in däm Oute,
sy chöme vo Basu,
sy chöme vom Gäu,
sy chöme vom Thau,
sy chöme vom Aargou,
ouououou grad vom Aargou
vom Aargou und vo überou
chöme d Lüt uf Oute
überau, überau die häreghoute
Lüt in Oute.
Und ig hocken irgendwo im Zug
ufere Bahnstrecki
zwüsche Züri und Oute
und ussedranne gsehni grad
der Chüeuturm vom AKW Gösgen
und i bi im obere Stock,
vo somne Doppustöckerzug
und liire scho
fasch e Haubschtung,
mit däm Vitali Tschörtschu,
aber was isch e Haubschtung?
E Haubschtung isch gar nüt!
Vo Outen hesch
e Haubschtung uf Basu
und e Haubschtung uf Züri
und e Haubschtung uf Bärn
und e Haubschtung uf Bieu,
und e Haubschtung überau häre.
Outen, Outen
isch e Haubschtundeschtadt,
es isch fasch glych
wo de bisch uf der Wäut,
uf Oute hesch eigetlech immer
und vo fasch überau här
öppen e Haubschtung.
Die Zentrumslage der Stadt Olten
im Herzen der Schweiz
ist und bleibt
einer der wesentlichen Pluspunkte
für Stadt und Region Olten.
Und i wott mis Billie nid zeige,
wöui nämlech vermuete,
dases de fertig chönnt sy,
mit üsem lockere Gschpräch
über Outen und über
aus wo mit däm Oute z tüe het
und drum frogeni der Giorgio
ober eigetlech ghürote syg.
Und der Giorgio strahlet,
verzöut vo deren Outnere,
woner z Outen imne Tea Room
heigi glehrt kenne
und wo zwar denn no
mit eim vo Strängubach
syg zäme gsy,
mit eim, wo ds Oute
ire Druckerei heigi gschaffet
und ir Freizyt
Ungerschrifte gsammlet heig
für meh Parkplätz
ir Schtadt Oute
und jetz dere Frou nochegränni,
dä Löffubueb, dä truurig.
Aber wie gseit,
däm Strängubacher
syni damaligi Fründin,
das syg jetz äbe syni Frou,
syg übrigens e gebürtigi Outnere
und schaffi äbefaus bir SBB,
am Schauter
und ob er jetze no,
mis Billie dörf gseh?
Aber do isch der Zug
scho ds Outen iigfahre
und der Tschörtschu het müesse go
und i bi usgschtige,
ohni mis Billie zeigt z ha.
Und sythär,
hani dä Giorgio
nie meh gseh,
aber vilecht schteit er hütt,
do ungen ufem Platz,
eifach so, zuefäuig
und luegt ueche und lostmer zue
und faus es eso wär:
Sälu Giorgio!
e liebe Gruess
und hopp Oute!
|
