Inhalt
Schlussrede des abtretenden Parlamentspräsidenten
- Geschäftsart
- Protokoll
- Datum
- 22. Juni 2017
- Beschreibung
- Sehr geehrter Herr Stadtpräsident,
liebi Stadtrötin ond Stadtröt,
werti Mitglieder vom Gmeindrot ond vo dr Verwaltig,
gschätzti Vertretig vo dr Press
liebi Gäst,
viele Dank dr Treichlergruppe vo dr Chlausezunft in Egerkingen för de imposant Uftritt. Dr Bruuch vom treichle wird jo duregfüehrt zum die böse Geister z vertriibe. Eg hoffe sie hend ou im Gmeindsparlament Erfolg demet.
Das Johr als „höchste Oltner“ esch jo wie im Flug verbii gange. Es esch en intensivi Ziit gsi, aber eg ha das Johr ou gnosse. Es het veli Höhepünkt gä. Quasi als Amtsiifüehrig han eg dörfe dr 1.August mit em Stadtpräsident ond em Regierigsrot Fürst fiire. Do han eg me scho sehr geehrt gfüehlt. Nachher het mit em Donnschtigjass ou sogleich en Höhepunkt stattgfonde. Es het ou derzueghört, dass eg a Aläss be gange, wo eg sösch wohl nie bsuecht hätt, ond för das beni ou dankbar. So hei mer d Tanztäg sehr gfalle ond binere Buechvernissage hets mer so gfalle, dass eg eine vo de letschte Awäsende gsi be ond de beni grad iiteilt worde, zum helfe uufruume.
Eine vo mine persönleche Höhepünkt esch gsi, dass dr Martin Wey mer d Ehr glo het, d Jungbürgerinne ond Jungbürger z vereidige.
Eg ha zahlrichi Aläss ond Institutione dörfe kennelerne. Eg ha i dem Johr ou Wert druuf gleit, dass eg be Illadige ou möglichscht cha go. So het das zur Folg gha, dass eg a eim Tag mol a 4 Aläss gsi be.
Was för me das Johr usmacht sind d Begegnige. Eg ha veli Lüüt dörfe kennelerne ond veli ou neui Aspekt vo eusere schöne Stadt dörfe erkunde. Eg gseh aso üsserst optimistisch id Zuekunft vo eusere Stadt wenn eg gseh wie velfältig ond wie vel kreativi aber ou schöpferische Chräft düend würke.
Eg danke insbesondere im Stadtrot ond dr Stadtrötin för die positivi Ufnahm. Eg ha das wörkli sehr gschätzt, dass der me immer grad iigschlosse hend ond me so positiv - jo fröndschaftlich, ufem usserparlamentarische Parkett unterstützt heit.
Eg danke ou im Markus Dietler, dr Erika Brunner ond dr Andrea von Känel för ehri Arbet,
bsonders danke wett eg im Parlamentsbüro wo sicher ned es eifachs Johr gha het. Eg ha das sehr gschätzt, dass der alli metgschaffet heit ond Euch iibrocht heit. Das Amtsjohr het jo es paar herusforderndi Traktande gha ond ou längeri Sitzige beinhaltet.
Vele Dank im Gmeindsparlament för die Zämenarbet i dem Johr. Minere Partei möchte eg ou danke, för die grossi Unterstützig i dem Johr, ond dass sie mer die Möglichkeit gä hend ond eg hoffe, dass eg d Partei ou würdig verträte ha.
Mer wird jo oft vorghalte, dass eg dr Mann der leisen Töne sig. Zum dem vehement entgegezträte go eg jetz umso luuter ond go im Schlepptau vo dr Treichlergruppe use. D Mitglieder vom Parlament trifft sich nachher im Sisieme zum Imbiss zum Legislaturendi ond eg hoffe, dass eg Euch ou in möglichst höcher Zahl am Schuelfestumzug werde gseh. Eg ha gschlosse.
Zugehörige Objekte
Datum | Sitzung |
---|